NGABASOLWA ababoshelwe ukusabisa ngokufuna ukuthatha imali ngodli Isithombe: SAPS
BAZOVELA eNkantolo yeMantshi yaseVulamehlo, eDududu, ngoLwesihlanu abasolwa abahlanu abaneminyaka ephakathi kuka-30 no-52 ubudala kulandela ukuboshwa kwabo esakhiweni samakhono esilungiswayo, eMzinto.
Kubikwa ukuthi laba basolwa abahlanu babanjwe oqotsheni kulesi sakhiwo samakhono esilungiswayo ngoLwesithathu, besabisa abanikazi benkontileka ngokubafuna imali ngenkani besabisa ngokuthi uma bengayikhiphi imali abayifunayo bazokumisa ukusebenza.
Ngokusho kokhulumela amaphoyisa aKwaZulu-Natal, uColonel Robert Netshiunda, amaphoyisa abehamba ezulazula kule ndawo ngenkathi elunywa indlebe ngabasolwa abasabisa abasebenzi benkontileka ngokuthi bazomisa umsebenzi uma bengakhokhelwa imali abayifunayo, abayibiza ngeyokubagada.
“Ngenkathi amaphoyisa egasela endaweni yesigameko babaficile laba basolwa abahlanu abebetshela abasebenzi benkontileka ukuthi bazomisa ukusebenza uma bengabaniki imali lena abayifunayo.
Ekufikeni kwawo amaphoyisa endaweni yesigameko athole ukuthi laba basolwa bebengasaqali ukufika kulesi sikhungo samakhono esilungiswayo, njengoba kuvela ukuthi ngenyanga edlule uNovemba baya amahlandla amabili beyosabisa abasebenzi benkontileka,” kulanda uColonel Netshiunda.
Uphethe ngokuthi ngenkathi laba balisa bethi babuyela kulesi sakhiwo ngoLwesithathu, yilapho behlangane khona nezimbila zithutha babe sebekhalelwa ngamasongo kaSgonyela.
