`Kushaqwe izidakamizwa kwaboshwa kwabasolwa

KUBUKEKA ngathi indawo yasOsizweni iyisizinda sezidakamizwa! Lokhu kufakazelwa ukuthi ayipheli inyanga amaphoyisa asOsizweni, eNewcastle, eNyakatho, neKwaZulu-Natal, engabophanga bantu abatholakala nezidakamizwa.  Kamuva nje amaphoyisa oPhiko lwe-Multi-Disciplinary Operation, okufakwa kulo i-Osizweni Crime Prevention kanye nawo wonke amaphoyisa angaphansi kwesiFunda Amajuba , abehambele lendawo esibalulwe ngenhla ngenhloso yokuwlisana nokushushumbiswa kanye nokusetshenziswa kwezidakamizwa, ngenkathi agasela emzini thizeni osesiGcemeni sakwa-D, ngoba ebelandela umkhondo wezidakamizwa, afike azishaqa. Ngokombiko othunyelwe ngamaphoyisa , athi athe uma efika  kulomuzi, asesha abe esethola amaphasela angu-12, ewhoonga kanye neHeroine obekugoqwe ngoplasitiki omnyama. Umbiko uqhube wathi kube sekuboshwa umsolwa oneminyaka engu-58, kanti lezidakamizwa ezitholakale kulomuzi zingabiza imali engu-R600.00, ngentengo yasesitaladini. Lomsolwa uboshwe ngesonto, mhlaka 10 December 2023, kanti usevelile eNkantolo kaMantshi waseMadadeni, uzophinde avele futhi maduzane ebhekene nalo icala lokutholakala nezidakamizwa. Lolu Phiko luphinde lwaqhubekela endaweni yaseMafahlawane , nalapho belilunywe indlebe khona ukuthi kunomuntu oshushumbisa izidakamizwa. Bathe embikweni wabo, bathe uma befika kulomuzi abebelayelwe wona bafike basesha bathola amaphasela angu-36, ewhoonga noma Heroine, abe esebopha umsolwa oneminyaka engu-32, kanti lezidakamizwa ezitholakale kulomsolwa zingabiza imali engu-R1000.00 ngentengo yasesitaladini. Kuphinde kwavela ukuthi kubo lobo busuku lamaphoyisa aphinde agasela komunye umuzi osesiGcemeni-A , khona Osizweni, lapho efike asesha athola amaphasela angu-17, ewhoonga, kwabe sekuboshwa umsolwa oneminyaka engu-27, kanti zonke lezidakamizwa ezitholwe kulomsolwa zingabiza imali engu-R1000.00, ngentengo yasemgwaqeni. Amaphoyisa athi azoqhubeka alwisane nokushushumbiswa kwezidakamizwa kulendawo aphinde ashabalalise zonke izidleke zezidakamizwa ezibulala isizwe. Laba basolwa bavelile eNkantolo kaMantshi waseMadadeni mhlaka 11 December 2023 , amacala abo abe esehlehliswa , bazophinde bavele kulenkantolo maduzane bebhekene nawo lamacala okushushumbisa izidakamizwa. Uphenyo lwamaphoyisa luyaqhubeka.