UMLISA oneminyaka engu-27 ugaxwe isigwebo seminyaka engu-23 ebhadla ejele ngemuva kokulahla yicala lokudlwengula ingane yentombazane eneminyaka engu-11, yiNkantolo yesiFunda yaseGreytown.
Ngokusho kokhulumela amaphoyisa esiFundeni uMzinyathi, uConstable Siyabonga Nkwanyana ukudlwengulwa kwale ntombazanyana yilo mlisa kwenzeka izikhawu ezimbili, okwaba ngu-nyaka ka-2020, no-Agasti ka-2022, endaweni yaseNhlanhleni, eGreytown.
“Ukhona nomunye umsolwa oneminyaka engu-29 osahamba icala, naye oyamaniswa nakho ukudlwengula kwesisulu sona lesisisulu, njengamanje usengaphandle ngebheyili.
“Icala lanikezwa uSgt Richard Gilden ukuba aliphenye ongaphansi kophiko lwe-Family Violence, Child Protection and Sexual Offences Unit, okunguyena owenze umsebenzi oncomekayo wokuqoqa bonke ubufakazi obenze ukuthi lo msolwa athole lesi sigwebo,” kusho uConstable Nkwanyana.
Ngaphandle nje kokugaxwa lesi sigwebo, igama lalo mlisa libe selifakwa ngaphansi kohlu lwabadlwenguli kuzwelonke (National Register for Sexual Offenders).
