NGUNGQONGQOSHE uMfu Thulasizwe Buthelezi.Isithombe. SITHUNYELWE
UNGQONGQOSHE wezokuBusa ngokuBambisana neziNdaba zoMdabu KwaZulu-Natal uMfu Thulasizwe Buthelezi , usekhiphe isexwayiso mayelana nezimvula ezinamandla okumele zihlasele esiFundazweni saKwaZulu-Natal, ngoLwesibili.
Kubikwa ukuthi lezi zimvula ezinamandla nezikhukhula zizobe zikusigaba sesine (level 4).
UMfu Buthelezi uthe esitatimendeni, lesi sixwayiso sikhishwe yizangoma zezulu (i-South African Weather Services) , phecelezi SAWS.
Uthe esitatimendeni, lezi zimvula zizoqhubeka kusukela ekuseni namuhla (ngoLwesibili), kuze kube ihora lokubumbana kweshumi neshiyagalombili (12), namuhla ebusuku.
Uqhube wathi oMasipala abazokhahlamezeka ilezimvula ,Abaqulusi, Alfred Duma Indaka, Alfred Duma – Ladysmith, Dannhauser, Dr N. Dlamini-Zuma -Underberg, eDumbe, eMadlangeni, Endumeni, Ethekwini, Greater Kokstad, Impendle, Ingwe, Inkosi Langalibalele Escourt, Inkosi Langalibalele Sobabili, KwaDukuza, Mandeni, Maphumulo, Mkhambathini, Mpofana Giants Castle, Mpofana Mooi River, Msinga, Mthonjaneni, Ndwedwe, Newcastle, Nkandla, Nquthu, Okhahlamba, Ray Nkonyeni, Richmond.
Kuvelile ukuthi lezi zimvula zilindeleke ezindaweni eziningi zakulesiFundazwe saKwaZulu-Natal, futhi zizocekela phansi imigwaqo ewubhuqu, ilimaze impahla kanye nenqalasizinda, icekele phansi izindlu zodaka ziphinde ziphazamise ukuhamba kwezimoto , njengoba kulindeleke ukuba imigwaqo ivalwe ngenxa yezimvula ezinamandla.
UMfu Buthelezi uthe esitatimendeni, abezimo eziphuthumayo kanye nabezezinhlekelele sebemi ngomumo ekuqapheni isimo, uma kuhlasela lezi zimvula ezinamandla ezihambisana nezikhukhula.
Uphinde waxwayisa izakhamizi esitatimendeni, ukuthi zingathathi uhambo olungenasidingo, bagweme ukuwela imifula igcwele, uma uvalelekile emotweni ngenxa yamanzi, zama ukuthi ugxume ,uphume emotweniukuze uphephe, susa impahla ebalulekile uma kunezixwayiso zemvula , bese kuthi abantu bahlale emakhaya , ezindlini futhi kumele bathathe imfuyo bayinyusele ezindaweni eziphezulu.
Uphethe ngokuthi esitatimendeni, izakhamizi kumele zizilalele izexwayiso mayelana nezimvula ezinamandla, futhi bazithathele phezulu izexwayiso.
