LABA ngabafundi abaklonyelisiwe beme neMeya yaseNewcastle uKhansela Xolani Dube kanye nelunga lephalamende uMnuz Sanele Zondo, kanye nezikhulu. Izithombe. LANGELIHLE CHAGWE
UMASIPALA waseNewcastle ubambisane nabaxhasi uklomelise abafundi abayishumi abaphase u-matric ngamalengiso emcimbini obubanjelwe e-Black Rock Casino, eNewcastle, ngoLwesithathu.
Laba bafundi abayishumi abaphase ngamalengiso ezifundweni ezahlukene ezikoleni zaseNewcastle baklonyeliswe ngemali, amavawutsha, ama-laptop, amaprinta, imali yokuthenga izimpahla zokugqoka, izitifiketi , izinkomishi, kwathi ababili baphinde bazizuzela omakhalekhukhwini kwabakwa-MTN, okubalwa kubo obaqwaqwade bonke esifundeni saseMajuba nolale isibili.
Izifundo abebeklonyeliswa ngaphansi kwazo abaphase ngamalengiso i-Mathematics, Physics, ne-Accounting.
Akugcinwanga ngokuklomelisa abafundi abaphase ngamalengiso njengoba kuphinde kwaklonyeliswa nezikole eziphase ngo-100% no-97%.
UMeya waseNewcastle, uMnuz Xolani Dube uthe: “Namhlanje sizobungaza ukuphasa kwenu ngamalengiso, siphinde sinihalalisele nabazali benu.
Iningi lenu belifunda ngaphansi kwesinzelelo eziningi njengoba nokufunda bekubuye kuphazamiseke ngenxa yala maqembu emigulukudu abehlalise lubhojozi abafundi ezikoleni, futhi nina nifunde ngenkathi kuqala umbhedukazwe we-Covid-19 owadlula nemiphefumulo yabantu abaningi,” kusho uDube.
Uphinde wakuveza ukuthi yena njengoba ethunywe inhlangano ye-Inkatha Freedom Party (IFP), bakhumbula kakhulu umholi nomsunguli wayo ongasekho, uMntwana uMangosuthi Buthelezi, owakha izikole eziningi KwaZulu-Natal, amakolishi namanyuvesi njengoba wayebeka phambili imfundo.
“Sikwazile ukubambisana nezinhlaka zomthetho ekuletheni uzinzo nokuthula ezikoleni zakulesi sifunda saseMajuba, njengoba bekuhlase amaqembu emigulukudu, futhi siyajabula kakhulu ngoba abafundi babhale ngokuthula ngaphandle kokuphazamiseka.
Ngiphinda ngidlulisa ukubonga okukhulu kini nonke bantwana abaphase ngamalengiso, futhi njengoba senithatha lolu hambo enilibhekise ezikhungweni zemfundo ephakeme ningalokothi nibheke izinto ezizoniphazamisa ezifundweni zenu, qinisekisani ukuthi niyaphasa ngoba isifunda saseMajuba nisibeke ebalazweni.”
Lo mcimbi ubuhanjelwe ngusinga ngqongqoshe wezeMfundo KwaZulu-Natal , (KZN education portfolio), ngaphansi kweqembu le-Democratic Alliance (DA), uDkt Imraam Keeka, othe: “Ngeke uyihambe indlela yamakhilomitha angu-1000, ungakaqali ngokuthatha igxathu lokuqala.”
Uphethe ngokubongela bonke abafundi abaphase ngamalengiso esifundeni saseMajuba wabe esebafisela impumelelo ezifundweni zabo njengoba sebebheka ezikhungweni zemfundo ephakeme.
Umfundi obaqwaqwade emakhanda eMajuba nguKwandokuhle Angel Mhlungu , obefunda ePhendukani High, eMadadeni, othole amamaki angu-1 705, emamakini angu-1 800 kuzwelonke, futhi akagcinanga ngokubaqwaqwada emakhanda lapha eMajuba uphinde walala isithathu esifundazweni i-KwaZulu-Natal.
Uklonyeliswe ngevawusha ka-R15 000, umakhalekhukhwini, iprinta, laptop, u-R 2000 wevawutsha yezimpahla zokugqoka, imali engu-R 2000 kanye nenye ivawutsha yama-data engu-R 2500, azoyithola inyanga nenyanga eqhamuka kwimeya yaseNewcastle.
Olale isibili eNewcastle kube ngu-Siphokuhle Mhlongo othole amamaki angu-1 673, yena uzitholele imali engu-R5 000, laptop, printa, izitifiketi kanye nevawutsha ka-R 2000 yokuthenga izingubo zokugqoka, yena ubefunda eBethamoya High, eMadadeni.
UMlungisi Mkhize obefunda eZama High, Osizweni, yena ulale isithathu ngamamaki angu-1 669, waklonyeliswa nge laptop, printa, R3 500 kanye nevawusha yokuthenga izingubo zokugqoka zika-R 2000.
UDube uphethe ngokubonga abazali, othisha noMnyango wezeMfundo esifundeni saseMajuba, akangabashiya abaxhasi bomcimbu okubalwa kubo i-Gardinia Coal Mine, MTN, Black Rock Casino, ne-All Wear.
Khonamanjalo, isikhungo sokuhlumelelisa ngezimilo izaphulamthetho ezisencane, i-Ekuseni Correctional Centre, esikhona eNewcastle, sihlabane ngo-100%.
Ezikoleni eziqwaqwade zonke kumasekethe azo (circuits) zona zikleliswe kanjena:
KwiPhumelela Circuit: i-Ferrum High ethole amaphesenti angu-100
Osizweni Circuit:kube yi Zibambeleni ngamaphesenti angu-97.6
EBuhleni Circuit :kwaba yi Sizanani ngamaphesenti angu-97.4
Madadeni Circuit:-Phendukani ngamaphesenti-angu-97.4
Masakhane Circuit: kube yi-Siyamukela ngamaphesenti-angu-97.1
