KWESINGENHLA nguKwandokuhle Mhlungu.Kwesingenzansi nguBonga Sibeko abaphasese umatric.Izithombe. ZITHUNYELWE
UNGQONGQOSHE wezeMfundo KwaZulu-Natal, uMnuz Sipho Hlomuka, uklomelise abafundi abaphase u-matric ngamalengiso waphinde wababonga emcimbini wokuklomelisa abafundi baka-matric obuse-International Convention Centre (ICC), eThekwini, ngoLwesibili.
Isifunda saseMajuba esibalwa nezifunda zaseKZN ezenza kahle ku-matric, ayisalanga ngaphandle njengoba abafundi ababili abaqhamuka kulesi sifunda nabo bebeyingxenye yabafundi abebemenywe nguNgqongqoshe wezeMfundo kulo mcimbi wokuklomelisa abafundi baka-matric.
Umfundi wasePhendukani Full Service School, uKwandokuhle Mhlungu (17) wasOsizweni, eNewcastle . uthole o-A ezifundweni eziyisishiyagalombili, wabe eseklonyeliswa ngama-laptop amane, umfundaze, i-medical aid azoyisebenzisa aze aphothule izifundo zakhe, imali engu-R10 000, nezitifiketi.
Kulezi zifundo eziyisishiyagalombili uKwandokuhle aziphase ashaye o-A kuzona, yi-Mathematics, Physical Science, Accounting, Geography, Life Sciences, Life Orientation, English nesiZulu. Uzoyokwenza izifundo zobudokotela e-Univesrity Of Cape Town (UCT).
Omunye umfundi obeke isifunda saseMajuba ebalazweni nguBonga Sibeko (19) waseMndozo, eNewcastle, obefunda eZazi High School, yena othole o-A abayisithupha waklonyeliswa nge-laptop nezitifiketi, kanti naye uzoyokwenza izifundo zobudokotela e-UCT.
Izifundo uBonga aziphase ngamalengiso o-A, yisiZulu , English, Mathematics, Life Orientation, Geography, Life Sciences, ne-Physical Science wayiphasa ngamaphesenti angu-100.
Ezikoleni ezingu-73 zasesifundeni saseMajuba ebezibhala u-matric ngonyaka odlule, ezingu-13 ziphase ngamaphesenti angu-100%, yilezi ezilandelayo:
Muzokhanyayo
Mzilikazi
Ferum
Dannhauser Sec
Phathakahle
Enzimane
Friendless
Siphuthando
Ngcaka
KwaMagudela
Ekuseni
Inzululwazi
Sinqobile
