UNGQONGQOSHE wezeMfundo KwaZulu-Natal uMnuz Sipho Hlomuka ugxeke isigameko sodlame noma isibhelu ezibheduke esikoleni samabanga aPhakeme uMdingi High School esise Donnybrook , esisabalele ezinkundleni zokuxhumana ngoLwesithathu.
Kubikwa ukuthi kubheduke udlame kulesi sikole uMdingi okungaziwa imbangela yaso lapho iqulu la bafundi lisabalele ezinkundleni zokuxhumana lihlaselana kanzima.
UMnuz Hlomuka uthe esitatimendeni , lolu dlame olubheduke kulesi sikole alwamukelekile , endaweni yesikole ngoba izikole kumele kube yindawo ephephile futhi amathishela nabafundi kumele bahlale bevikelekile.
“UMnyango ubona lesi senzo singukudelela kanye nokungaziphathi kahle kwabafundi, futhi bedelela nesiko lokufunda nokufundisa,” kusho yena.
Uqhube wathi bengumnyango sebejube izikhulu zomnyango ukuba zibize abazali, abafundi namathishela ukuze kucutshungulwa ukuthi ingabe yini imbangela yalobudlobongela obenzeke kulesi sikole.
“ Sizothathela bonke abathintekayo kulesi sigameko izinyathelo zokuqondisa ubugwegwe njengoba umthetho wesikole awukuvumeli lokhu obekwenzeka,” kusho uMnuz Hlomuka.
Uthe esitatimendeni , izikole kumele kube zindawo eziphephile zokufunda nokufundisa , hhayi ezodlame.
“Sisebenzisana nezinhlaka zomthetho ukuba zisiphenye lesi sigameko sodlame olubheduke kulesikole ukuze kuthathelwe abathintekayo izinyathelo ezinqala,” esho.
Uphinde wakuveza ukuthi abazali kumele badlale indima enkulu ekutheni bayakubheka ukuziphatha kwabafundi , ngaphakathi emagcekeni esikole nangaphandle.
Uthe esitatimendeni , kuzothunyelwa abazoluleka abantwana ngokwezenqondo nangokomphefumulo emva kwalesigameko esisabalele ezinkundleni zokuxhumana.
Ube esenxusa abafundi ukuba baxazulule izinkinga zabo zokuxabana, ngokuxoxisana hhayi ngodlame nangokulwa, futhi bacele ukwalulekwa ngamathishela kanye nezinye izinhlaka.
Uphethe ngokuthi udlame ezikoleni alwamukelekile ,futhi ababhebhethekisa udlame bazothathelwa izinyathelo ezinqala.
