NGABAQASHELWE ukuqikelela ukuthi amanzi awagxaxgazi noma awavuzi emapayipini
EKULWISANENI nokuvuza kwamanzi , aphinde amasheke, aphakela izakhamuzi , kuqashwe abantu abawu-350, ngaphansi kohlelo lwe-Expanded Public Works Programme (EPWP). UNgqongqoshe wezokuBusa ngokuBambisana neziNdaba zoMdabu, uNkk Bongiwe Sithole-Moloi , ukuvezile ukuthi laba abaqashiwe ngaphansi kwaloluhlelo baqashelwe ukulwisana nokuvuza kwamanzi agcina ngokumosheka kanti ngawo kusuke kuhloswe ukuthi aphakele izakhamuzi kodwa agcine engafikanga ngenxa yokuvuza kwamapayipi. Kuvelile ukuthi kunezinselelo eziningi emphakathini ezidalwa ukugxagxaza kwamansi bese egcina engafinyelelanga emiphakathini. UNgoqongqoshe Sithole-Moloi, wethule lolu hlelo lokulwisana nalenselelo e-Lindelani, KwaDukuza, eNyakatho naseGwini. Kuphinde kwavela ukuthi kusayindwe incwadi yesivumelwano nomasipala (Memorandum of Understanding),MOU, ukuthi kulungiswa indaba yokugxagxaza kwamanzi. “ Labantu abaqashiwe abawu-350, bazosebenza ngaphansi komasipala abahlukene abawu-5, kanti futhi bazosebenza inkontileka yezinyanga eziwu-12, futhi baqale ukuqala kwalenyanga ephezulu, May 2024,” esho. Uqhube wathi omasipala abazosebenza ngaphansi kwabo ilaba,Thekwini Metro, Ilembe District, Uthukela District, Umzinyathi District kanye no-Ugu District. Uthe kwabaqashiwe kukhona kubo ama athizeni (artisans) kanye nama egenti (water agents), abazosebenzisana nalaba abe EPWP, ekuvaleni amapayipi avuzayo. “ Ama athizeni wona azogxila kakhulu ezindaweni ezifana nase Umlazi , eThekwini, Gamalakhe,ePortshepstone,EZakheni,eLadysmith, Sibongile, eDundee kanye nase Lindelani KwaDukuza. Ngenkathi ethula lolu hlelo ungqongqoshe osebalulwe ngenhla ubehambisana neMeya yesiFunda Ilembe , uKhansela Thobani Shandu, lapho efike wanikelela mgamathuluzi amakhono , amathuluzi okusebenza kanye nezingubo zokuzivikela (personal protective equipment), kubo bonke abaqashelwe ukuqhuba lomsebenzi. Ethula inkulumo yakhe uthe ukuqashwa kwabantu abazolwisana nokuvuza kwamanzi kuncike kakhulu ezincelelweni ezidlangile zokushoda kwamanzi. “ Lokhu kuphinde kuhloswe ngakho ekungeneleleni nokulwisana kokushoda kwamanzi ezakhamuzini,” esho. Uqhube wathi kumosheka amabhiliyoni amarandi lapha esifundazweni ngokumosheka kwamanzi ngokuvuza.Uthe siqale ukwenza lol hlelo kulabomasipala abawu-5 , asebebalulwe ngenhla ngoba kuyibona abadinga usizo oluphuthumayo futhi okubonakalayo ukuthi kubona maningi amanzi amoshakalayo. Uqhube wathi bajabulile kakhulu ngoba lolu hlelo lwabo ludale amathuba omsebenzi amaningi, nabawatholile sebezokwazi ukuxosha ikati eziko. Uthe banethemba elikhulu lokuthi loluhlelo luzoqinisekisa ukuthi ayahanjiswa amanzi komasipala futhi kuyanqandeka nokumosheka kwawo okungenasidingo. Uthe omasipala kumele basayinise ama athizeni izinkontileka abazolwisana nokuvalwa kwamapayipi avuzayo. Uthe banesiqiniseko sokuthi lolu hlelo bazolundlulisela nakwabanye omasipala maduzane. Uphethe ngokunxusa izakhamuzi ukuba zizibike izigameko zokuvuza kwamanzi emiphakathini abahlala kuyona ukuze kunqandeke ukumoshakala kwamanzi okungenasidingo, waphinde waxwayisa labo abaxhuma amapayipi ngokungemthetho ukuba bakuyeke lokho futhi nomphakathi awuzibike izigameko ezifana nalezi.
