INHLANGANO yokugembula i-Hollywoodbets imemezele ngokusemthethweni ukuthi izizoxhasa iligi yabesilisa i-SAFA Men’s Regional League South Africa , ngelendlule. Lenhlangano yokugembula esibalulwe ngenhla iveze ukuthi iyakujabulela futhi iyazigqenya ngokuthi isiyenze isivumelwano ne- South African Football Association’s Men’s Regional League, sokuba ngabaxhasi kanye nokubambisana nayo lenhlangano yezebhola, ekuqhakambiseni nasekuthuthukisweni kwebhola lezinyawo eMzansi. Lesimemezelo senzeke e- SAFA House e-Gauteng, ngelendlule , lapho lesinqumo sithakaselwe yizo zonke lezinhlaka.
“ Lesimemezele kanye nalesithangami besihanjelwe ngabezindaba, ithimba lakwa-Hollywoodbets kanye nezikhulu ze-SAFA kanye SAFA Men’s Regional League. Loluxhaso lwe-Hollywood luyisivumelwano seminyaka emibili ngenhloso yokuthuthukisa ezemidlalo kanye nokuwuqhakambisa kabusha lomdlalo wamaligi eziFunda abesebonakala ngathi ayashabalala.Okhulumela i-Hollywoodbets uMnu Mphathi Nxumalo uthe “inhloso enkulu yaloluxhaso ukuvumbulula amakhona kubadlali kanye nokuqinisekisa ukuthi ezemidlalo nemiqhudelwano yazo iyaphila eziFundeni zonkana kanye nokuqinisekisa ukuthi amakilabhu asebenza ngokukhulu ubuyoncingwa.Uthi lokhu bakwenze ngokuthi bafake uchatha wemali ozoxhasa uma kunemiqhudelwano yama playoffs, ukuvumbulula amakhono kanye nokubheka abadlali abangase bathole ithuba lokuyodlala ebholeni lezinyawo elisemazingeni aPhezulu (Premier League). Uqhube wathi lolubambiswano futhi kuhloswe ngalo ukuthi kuqinisekiswe ukuthi bayabuyisela emphakathini abasebenzisana nawo wonkana. Uthe kungeke kuphikwe futhi kuyaziwa ukuthi ezemidlalo ikakhulukazi ibhola likanobhutshuzwayo liyaxhumanisa futhi liyakha liphinde libhekelele izidingo nqangi ezibhekene nemiphakathi mayelana nezezimali. UMnu Charles Zama oyi- Hollywoodbets Business Development Manager uthe okwabo akusikona nje ukuxhasa iligi yesiFunda kodwa kungaphezulu. Uthe lokhu kungukutshala emphakathini, kubadlali ukukhulisa kanye nokuqgugquzela ezemidlalo emiphakathini.
“ Ukungenelela kwethu noma ekuxhaseni kwethu sihlose ngakho ukuhlanganisa imiphakathi, sigqugquzele ezemidlalo emiphakathini esiyakhele kanye nokuthuthukisa amabhizinisi asafufusa emiphakathini. Usekele Mengameli we-SAFA uMnu Linda Zwane uthe bajabule kakhulu ngokusebenzisana kanye nokubambisana ne-Hollywoodbets ekuthuthukiseni ibhola ezindaweni zasemakhaya. Uqhube wathi bayajabula kakhulu ngokubambisana kanye kanye nokusebenzisana nenhlangano ekwaziyo ukuxhasa ibhola ngokwezimali futhi elaziyo nalo.
“ Bekunzima kakhulu emakilabhini ukuba aqhubekele phambili kodwa ngaloluxhaso lweminyaka emibili sizozuza lukhulu kwezemidlalo ukuze amakilabhu athuthuke nabafana bathuthuke bagcine sebedlala emazingeni aphezulu,” esho. Uqhube wathi ngemiklomele ezobe ibekiwe uma kunemiqhudelwano izogqugquzela kakhulu ukuthi amakilabhu kanye nabadlali badlale ngokuzimisela ngoba kuzobe kukhona abazokuzuzela amakilabhu abo, nabo uqobo.
“Bazobe bazi ukuthi kukhona abazokuzuza ngaphandle kokuphokophelela ukuyodlala ezigabeni eziphezulu. Ngalolubambiswano sibona ikusasa lamakilabhu kanye nelabadlali ligqakaze kakhulu. Uphethe ngokuthi loluxhaso lokwenza umehluko omkhulu kwezemidlalo eziFundeni nasekuthuthukisweni kwezemidlalo.
