IZAMBIA (yejezi eliwolintshi) ne-Angola emdlalweni kaGroup C weHollywoodbets COSAFA Women’s.Isithombe.COSAFA
I-ZAMBIA izibeke ethubeni elihle lokwedlulela emzuliswaneni womkhumulajezi kwi-Hollywoodbets COSAFA Women’s Championships ka-2024 ngokubhaxabula i-Angola 3-0 emdlalweni wokuqala kaGroup C, e-Isaac Wolfson Stadium, eGqeberha, e-Eastern Cape, ngoLwesine emini.
Ukunqoba kweZambia kusho ukuthi yiyona eqhwakele phezulu kuGroup C njengamanje, ilandelwe yiComoros endaweni yesibili engakadlali, nezodlala nayo iZambia ngoLwesibili ngo-12 emini, eNelson Mandela University Sports Stadium, eGqeberha.
Komunye umdlalo ka-Group B, i-Malawi ishayane yaze yabukana kuba ngu 1-1 neBotswana, komunye umdlalo obudlalelwa khona e-Isaac Wolfson Stadium, ntambama. Ukudlala ngokulingana kweMalawi engompetha abavikela isicoco seCosafa Women’s Championship eyasinqoba nyakenye iguqisa iZambia kowamanqamu, kusho ukuthi kudingeka iwunqobe kumnyama kubomvu umdlalo wayo olandelayo neMadagascar, ngoMgqibelo ngo-3 ntambama, eNelson Mandela University Sports Stadium.
Komunye umdlalo kaGroup B, iMadagascar izigwazele ibhece kwiMauritius ivulela isibhaxu sika 5-0 khona eWolfson Stadium.
Ku-Group A, iBanyana Banyana engosokhaya, iwuvule ngonyawo oluhle lo mqhudelwano weCosafa ngokuguqisa iNamibia ngo 1-0, ngoLwesibili, eNelson Mandela Bay Stadium. Kanti i-Eswatini yona ikhombise ukungasinisi mahleza inenebula i-Seychelles ngo 6-0, lokhu okusho ukuth i-Eswatini yiyona njengamanje ezihola phambili kuGroup A ngenxa yomehluko wamagoli yize ilingana ngamaphuzu neBanyana Banyana. Emdlalweni ka-Group D iMozambique ishaye iZimbabwe ngo 1-0, nosekusho ukuthi njengamanje ihlezi phezulu kuGroup ngamaphuzu amathathu.
Iqembu elithathwa njengelika-B weBanyana elibambe iqhaza kulo mqhudelwano weCosafa oqale ngoLwesibili, eGqeberha, liholwa ngumqeqeshi uMaud Khumalo.
Khonamanjalo, iqembu elikhulu leBanyana eliqeqeshwa nguDesiree Ellis, liseDenmark, lapho liyodlala khona owobungani neqembu lakhona eDenmark, ngoLwesihlanu ngo-6 ntambama, e-Aalborg, eDenmark.
IBanyana endala izosebenzisa lo mdlalo wangoLwesihlanu neDenmark ukuzicijela imidlalo yokuhlunga yeWomen’s Africa Cup of Nations (WAFCON) ka-2025.
Isiyonke imiphumela yeHollywoodbets COSAFA Women’s Championships ngoLwesine:
Group C:
Zambia 3-0 Angola
Group D:
Mozambique 1-0 Zimbabwe
GROUP A
Amaqembu P W D L F A PTS
Eswatini 1 1 0 0 6 0 3
South Africa 1 1 0 0 1 0 3
Namibia 1 0 0 1 0 1 0
Seychelles 1 0 0 1 0 6 0
GROUP B
Amaqembu P W D L F A Pts
Madagascar 1 1 0 0 5 1 3
Botswana 1 0 1 0 1 1 1
Malawi 1 0 1 0 1 1 1
Mauritius 1 0 0 1 1 5 0
GROUP C
Amaqembu P W D L F A Pts
Zambia 1 1 0 0 3 0 3
Comoros 0 0 0 0 0 0 0
Angola 1 0 0 1 0 3 0
GROUP D
Amaqembu P W D L F A Pts
Mozambique 1 1 0 0 1 0 3
Lesotho 0 0 0 0 0 0 0
Zimbabwe 1 0 0 1 0 1 0
