KUBOSHWE abasolwa abawu-4 kwashaqwa izidakamizwa, impahla yokwebiwa kanye nesibhamu esingekho emthethweni kanye nezinhlamvu. Lomkhankaso wenziwae i-Multi-Disciplinary Operation ebiyenziwa ngaphansi kwamaphoyisa Osizweni awophiko lwe-High Density Operation , obeluhlanganisa uphiko lwe-Osizweni SAPS, Public Order Policing (POP) , awaseNewcastle SAPS kanye nama-Amajuba District mhlaka 30 August 2024 kuya kumhlaka 1 August 2024. “ Ntambama amaphoyisa ethungatha abashushumbisa izidakamizwa ahambe ayogasela emzini thizeni osesigcemeni sakwa F lapho efike asesha athola izidakamizwa zohlobo lwemandrax eziwu-24 , abe esebopha umsolwa oneminyaka ewu-32. Lezidakamizwa zingabiza imali ewu-R2400.00, ngentengo yasesitaladini,” kusho isitatimende esithunyelwe ngamaphoyisa. Ngalo uLwesihlanu ebusuku amaphoyisa aphinde aya endaweni yakusigceme A , emva kokulunywa indlebe ngamalunga omphakathi ukuthi ushushumbisa izidakamizwa. Kuvelile ukuthi amaphoyisa athe uma efika kulendawo esesha athola abasolwa abawu-2 , nezimpahla okusolakala ukuthi zebiwe, okukhona kuzo nomakhalekhukhwini i-Samsung emnyama , abe esebopha abasolwa ababili oneminyaka ewu-27 nonewu-25. Kuphinde kwavela ukuthi lezimpahla zingabiza imali ewu-R3000.00, ngentengo yasemgwaqeni. Eqhubeka amaphoyisa ngomkhankaso wawo mhlaka 1 September alunywe indlebe ngokuthi kukhona umsolwa eMafahlawane ose JJ Tavern , ophethe isibhamu esingekho emthethweni. Kuvelile ukuthi ngenkathi lamaphoyisa egasela kulendawo , abophe umsolwa emva kokumthola nesibhamu esingekho emthethweni sohlobo lwe pistol ewu-9mm enefremu ecwebezelayo ngokusiliva kanye nesidunu esibhulawundi, abe esebopha umsolwa oneminyaka ewu-22. Kuphinde kwavela ukuthi lesibhamu singabiza imali ewu-R15 000.00. Lomkhankaso uthele izithelo ezinhle ngoba amaphoyisa akwazile ukubopha abasolwa abathathu abaneminyaka ewu-22, 25 kanye newu-27 , abatholakale nezidakamizwa , impahla eyebiwe kanye nesibhamu esingekho emthethweni, kanti bonke laba basolwa sebevelile eNkantolo ePhakeme yaseMadadeni , bebhekene nawo lamacala asebalulwe ngenhla kanti bazobuyela enkantolo maduzane futhi.
