KUBOSHWE abasolwa ababili abaneminyaka esukela kwengu-27 kuya kwengu-33 ezigamekweni ezimbili ezahlukene ngeSonto nangoMsombuluko.
Kubikwa ukuthi amaphoyisa abebhizi nomkhankaso wawo obizwa ngokuthi yi-Operation Vala Umgodi ,ngenkathi ebopha abasolwa ababili Esikhaleni, emva kokuba bebathole nezibhamu ezingekho emthethweni kanye nezinhlamvu.
Okhulumela amaphoyisa esiFundazweni saKwaZulu-Natal uLieutenant-Colonel Paul Magwaza uthe esitatimendeni, kuboshwe abasolwa ababili ezigamekweni ezimbili ezahlukene, ngenkathi amaphoyisa abebhizi nomkhankaso wawo owaziwa ngokuthi yi-Operation Vala Umgodi.
Uthe esitatimendeni , amaphoyisa alunywe indlebe ngokuthi kunemigulukudu emibili ebihlela ukuyobamba inkunzi kuhlonyiwe.
Uqhube wathi esitatimendeni , ngokolwazi olutholwe ngamaphoyisa, wukuthi laba basolwa bese bevele sebedune nemoto abazoyisebenzisa ekugileni lomkhuba wokubamba inkunzi kuhlonyiwe.
“Amaphoyisa alandele lomkhondo abe esebopha umsolwa wokuqala oneminyaka engu-27 Esikhaleni ngeSonto, kwathi ngoMsombuluko abe esebopha umsolwa wesibili oneminyaka engu-33, ngaphansi komkhankaso i-Operation Vala Umgodi,” kusho uLieutenant-Colonel Magwaza, eqhuba ethi naye umsolwa wesibili utholakale nesibhamu esingekho emthethweni kanye nezinhlamvu ngenkathi eboshwa.
Uqhube wathi esitatimendeni , imoto ebiduniwe kusetshenziswe ubuchwepheshe i-Tracker yabe isitholakala KwaDukuza.
Uphethe ngokuthi abasolwa bo babili bazovela eNkantolo kaMantshi wase Esikhaleni ngoLwesithathu mhlaka 19 Mashi 2025, bebhekene namacala okutholakala nezibhamu ezingekho emthethweni kanye nelokuduna imoto.
