IQEMBU leBanyana Banyana elifinyelele kowamanqamu eHollywoodbets Cosafa Women’s Championship ngokushaya iMozambique, lizodudulana neZambia kowamanqamu e-Isaac Wolfson Stadium, eGqeberha, ngoMgqibelo ntambama Isithombe: COSAFA FACEBOOK
UFANA nowamagqubu umdlalo wamanqamu eHollywoodbets Cosafa Women’s Championship phakathi kweBanyana Banyana neZambia, njengoa iBanyana yaguqiswa yiZambia kowamanqamu alo mqhudelwano ngo-2022.
IBanyana izotholana phezulu neCopper Queens kowamanqamu alo mqhudelwano, e-Isaac Wolfson Stadium, ngoMgqibelo ngo-3 ntambama.
IBanyana ifinyelele kowamanqamu ngokuguqisa iMozambique ngo 4-1 sekukhahlelwa amaphenathi uma sekuhlanganiswa namagoli alo mdlalo wala maqembu obuphele zibambene ngo 1-1.
Kanti iCopper Queens yona ifinyelele kowamanqamu ngokubhaxabula iMalawi ngo 2-0, iziphindiselela kwazise iMalawi ebingompetha abavikela isicoco salo mqhudelwano weCosafa kuyiyona eyaguqisa iCopper Queens kowamanqamu alo mqhudelwano nyakenye.
Ngaphandle kokuba ngumdlalo wamanqamu oweBanyana neCopper Queens, iBanyana ibhekene nenselelo yokubuyisa isithunzi sayo kulo mqhudelwano weCosafa esaphethe irekhodi lawo lokuwunqoba amahlandla ayisikhombisa ukwedlula wonke amaqembu kusukela ekusungulweni kwawo ngo-2002.
Nokho, leli qembu elingosokhaya lagcina ngo-2020 ukunqoba lo mqhudelwano ngokuguqisa iBotswana ngo 2-1 kowamanqamu.
Umqeqeshi weBanyana, uMaud Khumalo, uthe bazosebenzisa elinye iqhinmga emdlalweni wamanqamu neZambia.
“IZambia inabadlali abanemizimba eqatha, ngakho kuzofanele sishintshe iqhinga lethu lokudlala ukuzwe sikwazi ukumelana nayo. Sizobona ukuthi ukuthi yibaphi abadlali esizobasebenzisa ezindaweni ezithile. Sizoshintsha ukwenza, ukuze sikwazi ukuwunqoba lo mdlalo sibuye nendebe,” kusho uKhumalo, oncome abadlali bakhe ngendlela abakhombise ngayo isibindi nokuvuthwa emdlalweni wowandulela owamanqamu behlula iMozambique.
