Kusale  izigebengu ezintathu  enkundleni zitholene phezulu namaphoyisa ngenganono e-Nanda

KUSALE  izigebengu ezintathu enkundleni ngenkathi zitholene phezulu namaphoyisa ngenganono e-Nanda. Kuvelile ukuthi lezigebengu bezifunwa phansi phezulu ngamaphoyisa , ngoba bezinecala lokubulala iphoyisa elabe linguSayitsheni uYekani Siboniso Thabethe, owabe eneminyaka ewu-37, ngenkathi ephucwa isibhamu sakhe somsebenzi wabe eseyadutshulwa.  Kuphinde kwavela ukuthi lesigameko senzeka ngonyaka u-2023. Okhulumela amaphoyisa esiFundazweni i-KwaZulu-Natal, uCol Robert Netshiunda, uthe ngoLwesibili ebusuku amaphoyisa alunywe indlebe ngalezigebengu ukuthi zibhace endaweni yaseCongo. Uthe ngenkathi amaphoyisa oPhiko iProvincial DPCI Tracking Team, DPCI Anti gang Unit, KwaZulu -Natal Provincial Tactical Response Team, Pietermaritzburg K9 Unit , Inanda Task team kanye nonogada abazimele begasela kuendawo emva kokulunywa indlebe , abathe mabefika endlini ethize eNombonjani, eMtshali Road, abasolwa abane bavele bavulela ngenganono bebhekise emaphoyiseni. Uqhube wathi kube nokudubulana, kwabe sekutholakala abawu-3, babasolwa sebesele enkundleni emva kokudubulana namaphoyisa. “ Oyedwa wabasolwa ukhonile ukuphulukundlela , wabalekela endaweni esebumnyameni,” esho. Uqhube wathi amaphoyisa ayamthungatha kumanje. Uthe labasolwa bayamaniswe  ngokudutshulwa kubulawe uSayitsheni Thabethe owabe esebenzela i-KwaMashu Tracking Team, emva kokuba bemphuce isibhamu somsebenzi , maqede bamdubula bambulala ngaso ngo June 2023. Uphethe ngokuthi bebefunwa ngamanye amacala amabili okubulala  avulwa eNanda ngo January 2024 kanye namanye amabili avulwa ngonyaka u-2021 kanye no-2023. Uphenyo lwamaphoyisa luyaqhubeka.